6月2日，我哋喺校園其中一棵樹上面發現咗13條毛毛蟲，每一條都好似朱古力手指咁大條，
我哋捉晒佢哋落嚟，放喺一個箱仔入面，當時13條一齊，都真係幾恐怖。
我哋興致勃勃咁諗住養大啲毛毛蟲，希望佢會變蝴蝶，但係可能係我哋唔識點照顧佢哋，
幾日後，只係死剩一條，就佢上圖青BB果條勒，佢係老大。
喺呢個時候，我哋再發現咗兩條好細嘅蟲BB，佢哋係呀肥同呀細。
幾日後，老大開始吐絲勒！睇吓，喺佢身上幼幼嘅白色絲，睇到嗎？
十幾日後，老大都係無乜改變，但係呀細就大得好快，比幾張佢為食大特寫大家睇吓！
6月19日，呀肥開始吐絲勒，佢仲識得用樹葉遮住自己，真係醒！
我忍唔住掀開塊樹葉睇吓，佢而家白雪雪，好似充滿蛋白質咁！
而老大呢，呢日佢變得唔尋常咁黑，好似有事要發生咁！
6月20日，睇吓老大先，點解唔同咗嘅？無咁黑喎。
原來搞錯咗，上面果個係呀肥，咁老大呢？佢喺下面，不過......得番個殼！
因為佢已經出世勒！睇吓佢個肚仔？
仲有背脊......
但係，究竟你係飛蛾定蝴蝶呢，係咪對翼未張開咋？我哋一直用養蝴蝶嘅心情期待你出世，
今日你終於同我哋見面勒，無論你係蝴蝶定飛蛾；係天鵝定係醜小鴨，我哋同樣咁開心！
